Flag of Democratic Republic of Nepal
YOU ARE HERE :   
Quick Links
CA Election 2070
Press Release
Jul 14, 2017
नेपाली कांग्रेस केन्द्रीय कार्यसमितिको बैठक असार ३०, २०७४ । श्रद्धेय नेता रामहरि जोशीप्रति श्रद्धाञ्जली

 नेपाली कांग्रेस केन्द्रीय कार्यसमिति
को असार ३०, २०७४ मा सभापति श्री शेरबहादुर देउवाज्यूको अध्यक्षतामा बसेको 
आकस्मिक बैठकद्वारा श्रद्धेय नेता रामहरि जोशीको निधनप्रति गहिरो दुःख व्यक्त गर्दै पारित
शोक प्रस्ताव र निर्णय
 
१. नेपाली कांग्रेस पार्टीको स्थापनाकालदेखिका श्रद्धेय नेता रामहरि जोशीको निधनबाट नेपाली कांग्रेस पार्टी स्तब्ध र मर्माहत भएको छ । २००३ सालमा नेपाली राष्ट्रिय कांग्रेसको स्थापना र २००७ सालको ऐतिहासिक जनक्रान्तिमा अग्रणी भूमिका निर्वाह गर्नु हुने श्रद्धेय जोशी लोकतान्त्रिक मूल्य पद्धतिप्रति अविचलित आस्था, सादगीपूर्ण जीवन र निष्ठाको राजनीतिको प्रतिमूर्ति हुनुहुन्थ्यो । पार्टीको वैचारिक र ऐतिहासिक पक्षमा सधै वहस र योगदान गर्दै २०४८ सालमा मन्त्रिको भूमिकामा सरकारमा सहभागी हुँदा समेत सुदृढ नैतिक व्यवहारले पार्टी पंक्ति र नेपाली जनमतलाई श्रद्धेय जोशीले गहिरो ढंगले प्रभावित गर्नु भयो । केन्द्रको राजनीतिको आकर्षण भन्दा गाउँ र जिल्लाका जनताहरुलाई लोकतान्त्रिक आन्दोलन, अहिंसा र शैक्षिक चेतनाको क्षेत्रमा समेत उत्प्रेरित गर्ने नेताको रुपमा परिचित हुनुहुन्थ्यो । पार्टीको स्थापनाकालिन नेता श्रद्धेय रामहरि जोशीको निधनबाट मर्माहत भएका कांग्रेसको समग्र नेतृत्व पंक्ति र साथीहरुको भावनालाई प्रतिनिधित्व गर्दै नेपाली कांग्रेस केन्द्रीय कार्यसमितिको यो बैठक श्रद्धेय जोशीप्रति हार्दिक श्रद्धाञ्जली व्यक्त गर्दै उहाँको आत्माको चीर शान्तिको कामना गर्दछ । साथै, शोक सन्तप्त परिवारजनप्रति हार्दिक समवेदना प्रकट गर्दछ । 
२. नेपाली लोकतान्त्रिक आन्दोलनका एक अथक योद्धा स्वर्गीय रामहरि जोशीप्रति सम्मान प्रकट गर्दै २०७४ असार ३०, ३१ र श्रावण १ गते तीन दिनसम्म पार्टीको केन्द्रीय कार्यालय र सबै जिल्ला कार्यालयहरुमा पार्टीको झण्डा आधा झुकाउनुका साथै श्रावण १ गते आइतबारका दिन केन्द्र तथा जिल्लाका सबै कार्यालयहरु बन्द गर्ने निर्णय गर्दछ । 
 
 
 
कृष्णप्रसाद पौडेल
मुख्य सचिव
Share on Facebook

Attachments#
No files