आजभन्दा करिब ८० वर्षअघि मुलुकमा विद्यमान जहाँनिया हुकुमी शासनको विरुद्ध नेपाली जनतालाई जनक्रान्तिको आह्वान गर्ने उद्देश्यका साथ नेपाली कांग्रेसको स्थापना भएको हो। स्थापनाकाल देखि नै पार्टीले जनतालाई मुलुकको सर्वोच्च र निर्णायक शक्ति मानेर अघि बढ्दै आएको छ। लोकतन्त्रको सुदृढीकरण, संस्थागतीकरण र बहुलवादका मूल्यमा आधारित समाज निर्माण नेपाली कांग्रेसको मूल आधार हो। यही दृढ विश्वासका कारण नेपालको राजनीतिमा आइपर्ने हरेक परिवर्तन र निर्णायक घडीमा नेपाली जनताले नेपाली कांग्रेस प्रति गहिरो विश्वास र समर्थन प्रकट गर्दै आएका छन्।

शिक्षा, स्वास्थ्य, यातायात जस्ता राज्यका आधारभूत दायित्वसँग सम्बन्धित नीति तथा कार्यक्रमको तर्जुमा गर्दै महिला, विपन्न, किसान, मजदुर, सामाजिक रूपमा पछाडि परेका तथा श्रोतसँग पहुँच नभएका र वन्चित भएका सीमान्तीकृत समुदायलाई सशक्त बनाउने हाम्रो प्राथमिकता हो। उनीहरूको आर्थिक तथा सामाजिक उत्थानका लागि आवश्यक पूर्वाधार, सीप र प्रविधिको विकास गर्दै अवसरहरू सिर्जना गर्न हामी प्रतिबद्ध छौं। आर्थिक उदारीकरण मार्फत औद्योगीकरण र रोजगारीको वातावरण निर्माण गर्ने, विश्व बजारसँग नेपाली सीप र दक्षताको पहुँच विस्तार गर्ने, जलवायु परिवर्तनको सन्दर्भमा जलस्रोत र जैविक विविधताको संरक्षण गर्ने तथा दिगो विकासका लक्ष्यहरू हासिल गर्दै समृद्ध र आत्मनिर्भर नेपालको निर्माण गर्नु नेपाली कांग्रेसको दीर्घकालीन दृष्टिकोण हो। सुशासन, विधिको शासन, मानव अधिकार, सामाजिक न्याय, आर्थिक समानता र समावेशी लोकतान्त्रिक मूल्य–मान्यताको संरक्षण गर्दै सबै नागरिकका लागि गरिमापूर्ण जीवन सुनिश्चित गर्न हामी दृढ रूपमा प्रतिबद्ध छौं।

नेपाली कांग्रेस आफ्ना सफलता र शक्ति मात्र होइन, असफलता र कमजोरीसमेत जनतासामु खुला रूपमा स्वीकार गर्न सधैं तयार रहँदै आएको छ। त्यसैले लोकतन्त्र स्थापना गरेर मात्र पार्टी सन्तुष्ट भएको छैन। आज देश र जनतामाथि आइपर्ने अनेकौं चुनौती र कठिनाइबीच पनि लोकतान्त्रिक संस्थाको रक्षा गर्दै ‘समुन्नत नेपाल, सम्मानित नेपाली’ को अभियानमा हामी निरन्तर अग्रसर छौं।

राजनीतिक स्थायित्व, आन्तरिक लोकतन्त्र र संगठनात्मक सुदृढीकरण बिना राष्ट्र निर्माण सम्भव हुँदैन भन्ने हाम्रो स्पष्ट बुझाई छ। त्यसैले नेपाली कांग्रेस समयको मागअनुसार आत्मसमीक्षा, सुधार र एकतामार्फत पार्टीलाई थप सक्षम, उत्तरदायी र जनमुखी बनाउँदै लैजान प्रतिबद्ध छ। राष्ट्रिय हितलाई केन्द्रमा राख्दै मतभेदलाई संवाद र सहमतिमा रूपान्तरण गर्ने राजनीतिक संस्कारको विकास गर्नु नै आजको हाम्रो प्रमुख दायित्व हो।